التذكرة اللي فيها معلومات كافية بتتحل من أول رد. والتذكرة اللي فيها «الموقع مش شغال» بتاخد تلات ردود ذهاب وإياب قبل ما نبدأ نشتغل أصلًا. الشرح ده بيقولك تكتب إيه بالظبط.
القاعدة في سطر: اكتب إيه اللي حصل، وإمتى، وإيه اللي جربته، ونص رسالة الخطأ حرفيًا.
المعلومات الأساسية — في كل تذكرة
- اسم الدومين — بنستقبل تذاكر كتير من غيره ومش بنعرف نبدأ.
- الرابط بالظبط اللي فيه المشكلة، مش الرئيسية بس.
- نص رسالة الخطأ كاملة — انسخها زي ما هي، وما تلخّصهاش.
- إمتى بدأت — النهاردة الصبح؟ بعد تحديث؟ من أسبوع؟
- آخر تعديل عملته قبل المشكلة — ده بيحل نص الحالات لوحده.
حسب نوع المشكلة
موقع مش شغّال أو رسالة خطأ
- كود الخطأ لو موجود (500، 403، 404...).
- صورة للشاشة.
- بيحصل لكل الزوار ولا ليك بس؟
- جربت من شبكة تانية أو موبايل؟
مشكلة بريد
- عنوان البريد كامل.
- في الإرسال ولا الاستقبال ولا الاتنين؟
- نص رسالة الارتداد كاملة لو فيه.
- لو الرسايل بتروح سبام: نسخة من Show original لرسالة وصلت السبام.
- البرنامج اللي بتستخدمه وإصداره.
الموقع بطيء
- بطيء من إمتى؟
- الموقع كله ولا صفحة معيّنة؟
- صورة من شاشة Resource Usage.
- إيه اللي اتغيّر قبل البطء؟
مشكلة دفع أو فاتورة
- رقم الفاتورة.
- طريقة الدفع.
- صورة الإيصال لو التحويل يدوي.
- الرقم أو الحساب اللي حوّلت منه.
حاجات بتبطّأ الحل
- «الموقع مش شغال» من غير أي تفاصيل — أول ردنا هيبقى أسئلة.
- تلخيص رسالة الخطأ بدل نسخها. الصيغة الحرفية فيها معلومات بتفرق.
- فتح أكتر من تذكرة لنفس المشكلة — بيقسّم المتابعة ويبطّأ كل واحدة.
- الرد بـ «لسه؟» كل شوية — بيرجّع التذكرة لآخر الطابور في بعض الأنظمة.
- إرسال البيانات في صورة بدل نص — مش بنقدر ننسخ منها.
حاجة مهمة عن كلمات المرور
ما تبعتش كلمات مرورك في التذكرة. فريق الدعم عنده وصول للحساب من الأدمن ومش محتاجها. ولو احتجنا حاجة معيّنة هنطلبها بطريقة آمنة.
ولو محتاج تدي مطوّر وصول، اعمله حساب فرعي أو حساب FTP بصلاحيات محددة بدل ما تدّي بياناتك الأساسية.
اختار القسم الصح
- الدعم الفني — مشاكل الموقع والبريد والسيرفر.
- الحسابات والمبيعات — الفواتير والدفع والترقية والاسترداد.
التذكرة في القسم الغلط بتتحوّل، وده وقت ضايع.
لو الموضوع عاجل
وضّح ده في أول سطر واشرح الأثر — «المتجر واقف والطلبات متوقفة» مختلفة عن «عايز أفهم إعداد». ولو الوضع حرج فعلًا، كلّمنا على 01004740999 بعد ما تفتح التذكرة، وقول رقمها.
قبل ما تفتح التذكرة
دوّر في مكتبة الشروحات الأول — كتير من المشاكل الشائعة ليها شرح كامل خطوة بخطوة، وهتلاقي الحل أسرع من انتظار الرد.
الخطوة الجاية
- كتابة تذكرة جديدة بحسابنا في منطقه العميل.
- كيف يمكنني الرد على تذكرة سابقة في مركز الدعم الفني.
- قسم الحسابات والمبيعات.
محتاج مساعدة؟
لو مش متأكد إيه المعلومات المطلوبة لحالتك، افتح التذكرة واشرح المشكلة بكلامك، وهنسألك على اللي ناقص.
