الموقع بيفتح بعد النقل؟ كويس، بس ده مش معناه إن كل حاجة تمام. فيه حاجات كتير بتفضل مكسورة بصمت لأسابيع. الشرح ده تشيك ليست تراجعها بعد أي نقل.
اعمل المراجعة دي مرتين: مرة بعد النقل مباشرة، ومرة بعد ٤٨ ساعة لما الانتشار يخلص.
الموقع
١. الصفحات الأساسية
الرئيسية، وصفحة داخلية، ومقال، وصفحة تواصل. جرّب روابط داخلية كمان.
٢. الصور والتنسيق
افتح F12 وشوف تبويب Console — أي ملف مش بيتحمّل هيظهر بالأحمر. راجع شرح الموقع بيحمّل ناقص أو الصور مش ظاهرة.
٣. النماذج
املا نموذج التواصل وابعته فعلًا واتأكد إن الرسالة وصلت. النماذج من أكتر حاجة بتقع بعد النقل وما حدش بيلاحظ إلا لما عميل يشتكي إنه راسل ومحدش رد.
٤. لوحة التحكم
سجّل دخول، وجرّب تعديل صفحة وحفظها، وارفع صورة.
٥. المتجر لو عندك
ضيف منتج للسلة، وادخل صفحة الدفع، واعمل طلب تجريبي كامل. واتأكد إن رسالة تأكيد الطلب بتوصل.
البريد
٦. كل الحسابات موجودة
قارن القايمة بالقايمة القديمة. حساب واحد ناقص معناه رسايل بترتد.
٧. الاستقبال والإرسال
ابعت رسالة من برّه لكل عنوان مهم، وابعت من كل عنوان لبرّه.
٨. الرسايل القديمة
افتح كل صندوق واتأكد إن الرسايل القديمة موجودة بمجلداتها. دي أكتر حاجة بتضيع في النقل.
٩. توثيق البريد
سجلات SPF و DKIM بتاعتك القديمة بقت غلط — كانت بتشاور على السيرفر القديم. ظبّطهم من جديد فورًا، وإلا رسايلك هتبدأ تروح سبام خلال أيام.
الإعدادات التقنية
١٠. شهادة SSL
افتح الموقع بـ HTTPS واتأكد إن القفل ظاهر. وجرّب النسخة بـ www ومن غيرها.
١١. المهام المجدولة
مش بتتنقل تلقائيًا. راجع قايمة الـ cron في السيرفر القديم وأعد إنشاءها. النسخ الاحتياطي التلقائي وإشعارات الطلبات بتعتمد عليها.
١٢. سجلات النطاق المخصصة
أي سجل ضفته يدوي — تحقق ملكية، أو سجل لخدمة خارجية، أو ساب دومين. راجعها كلها.
بعد أسبوع
- راجع Search Console — لو ظهرت أخطاء زحف جديدة، فيه حاجة مكسورة.
- راجع سرعة الموقع وقارنها بقبل النقل.
- راجع سجلات الأخطاء في cPanel.
- راجع البريد — اسأل موظفينك لو فيه رسايل متوقعة ما وصلتش.
- خد نسخة احتياطية جديدة من السيرفر الجديد ونزّلها.
لحد ما تتأكد إن كل بند في القايمة دي تمام، وإن مفيش حاجة اكتشفتها متأخر. الإلغاء المبكر أكتر ندم بيحصل بعد النقل.
البنود اللي بتتنسى أكتر
- سجلات SPF و DKIM.
- المهام المجدولة.
- الرسايل القديمة.
- نماذج التواصل.
- حسابات FTP.
الخطوة الجاية
- إزاي تظبط SPF و DKIM و DMARC عشان رسايلك ما تروحش سبام.
- تغيير Nameservers من غير توقف الموقع.
- الوظائف المجدولة Cron Job.
محتاج مساعدة؟
افتح تذكرة وابعتلنا البند اللي لقيت فيه مشكلة، وهنراجعه معاك.
