ده أعمق حاجة جديدة في cPanel. MCP بيخلّيك توصّل حساب الاستضافة بأداة ذكاء اصطناعي على جهازك — زي Claude Code — فتقدر تدير استضافتك وإنت في محرّر الكود من غير ما تفتح المتصفح.
إيه هو MCP بالظبط
MCP اختصار Model Context Protocol — لغة مشتركة بتخلّي أدوات الذكاء الاصطناعي تتكلّم مع الخدمات. لما توصّل cPanel بيه، الأداة بتقدر تشوف حسابك وتشتغل عليه بأوامر بالعربي أو الإنجليزي.
الفرق بينه وبين Ask AI اللي جوه اللوحة:
- Ask AI — جوه المتصفح، بيشرح ويرشد، لأي حد.
- MCP — على جهازك، بيشتغل مع ملفات مشروعك، للمطوّرين.
لو إنت مش بتستخدم محرّر أكواد ولا سطر الأوامر، الشرح ده مش ليك ومش هتحتاجه — وده مايفرقش في إدارة موقعك خالص.
استخدم Ask AI جوه لوحة التحكم، هيوصّلك لنفس الحاجات بخطوات أبسط. راجع شرح مساعد cPanel الذكي.
محتاج إيه قبل ما تبدأ
- حسابك على واجهة Meridian — مش Jupiter.
- حساب WebPros — دي الشركة المالكة لـ cPanel. لو معندكش، هتعمله وقت الربط.
- Claude Code مركّب على جهازك.
- راحة في التعامل مع ملفات الإعدادات وسطر الأوامر.
الخطوات
١. اربط حساب WebPros
- من cPanel، اضغط على صورة حسابك فوق واختار Profile أو Account Preferences.
- دوّر على قسم MCP Connection.
- اضغط Link WebPros Account.
- سجّل دخولك بحساب WebPros في النافذة اللي هتفتح.
٢. هات ملف الإعدادات
بعد الربط، من نفس القسم MCP Connection هتلاقي خيارين: تنزّل ملف mcp.json، أو تنسخ بيانات الاتصال.
٣. حطّه في إعدادات Claude Code
محتواه بيتحط جوه قسم mcpServers في واحد من ملفين — على حسب إنت عايز الوصول يكون ليك لوحدك ولا للفريق:
~/.claude.json ← ليك إنت لوحدك على جهازك .mcp.json ← في جذر المشروع، يتشارك مع الفريق
ملف .mcp.json بيتحط في جذر المستودع — يعني لو رفعت المشروع على GitHub، بيترفع معاه.
قبل ما ترفع، راجع محتواه واتأكد إنه مافيهوش أي بيانات اعتماد. ولو فيه، ضيفه لـ .gitignore واستخدم ملف
~/.claude.json بدله. بيانات دخول مرفوعة على مستودع عام = حساب مخترق.٤. وصّل Claude Code
- اقفل Claude Code وافتحه تاني عشان يقرا الإعدادات الجديدة — لو ماعملتش كده مش هيشوف الخادم.
- اكتب الأمر:
/mcp
- اختار خيار المصادقة من القايمة.
- هيفتحلك المتصفح — كمّل تسجيل الدخول هناك.
- لما يخلص، ارجع للأداة وهتلاقي الاتصال شغّال.
الفكرة إنك تدير الاستضافة من نفس المكان اللي بتكتب فيه الكود — نشر الموقع، ومتابعة صيانة الحساب، ومراجعة حالته، بأوامر عادية بدل ما تفتح المتصفح وتنقل بين الأدوات.
الأمان — اقرا ده كويس
إنت بتدي أداة على جهازك صلاحية توصل لحساب استضافتك. ده قوي ومفيد، وبيستاهل انضباط:
- ماتحطّش الإعدادات على جهاز مشترك ولا جهاز مش بتاعك.
- راجع أي أمر قبل ما تأكده — خصوصًا اللي بيمسح أو بيستبدل ملفات.
- خد نسخة احتياطية قبل أي شغل كبير. راجع شرح تجهيز نسخة احتياطية كاملة للموقع.
- جرّب على ساب دومين أو نسخة تجريبية قبل الموقع الأساسي.
- افصل الربط لو وقّفت الشغل على المشروع.
إزاي تفصل الربط
من Account Preferences ← قسم MCP Connection، اضغط Unlink WebPros Account.
ده بيفصل حساب WebPros عن حساب cPanel، ولو حبيت ترجّعه هتسجّل دخول من الأول تاني.
لو حصلت مشكلة
- الأداة مش شايفة الخادم — غالبًا ماقفلتش وفتحت Claude Code تاني، أو الملف اتحط في مكان غلط.
- خطأ في صيغة الملف — تأكد إن المحتوى اتحط جوه قسم mcpServers وإن الأقواس والفواصل مظبوطة. أي فاصلة زيادة بتكسر الملف كله.
- المصادقة بتفشل — اتأكد إن حساب WebPros لسه مربوط من Account Preferences.
- قسم MCP Connection مش ظاهر — إنت على Jupiter. بدّل لـ Meridian الأول.
الخطوة الجاية
- مساعد cPanel الذكي Ask AI: إيه بيعمل وإيه مابيعملوش.
- إيه هو Meridian والفرق بينه وبين Jupiter.
- تجهيز نسخة إحتياطية كاملة للموقع عن طريق السي بنل.
محتاج مساعدة؟
لو واجهتك مشكلة في الربط، افتح تذكرة باسم الدومين ورسالة الخطأ، وهنساعدك. وماتبعتش محتوى ملف الإعدادات في التذكرة — ابعت رسالة الخطأ بس.
