Sitejet Builder أداة بناء مواقع بالسحب والإفلات جوه cPanel نفسها — من غير ما تركّب ووردبريس ولا تتعامل مع إضافات ولا تحديثات. الشرح ده بيوريك تستخدمها إزاي، وإيه اللي لازم تعمله قبلها.
لو الدومين اللي هتبني عليه عليه موقع موجود فعلًا، النشر بـ Sitejet بينزّل الموقع الجديد على نفس الدومين. ومعندناش تأكيد موثّق من cPanel عن مصير الملفات القديمة في الحالة دي.
يعني ماتعتبرش إن موقعك القديم هيفضل موجود.
اللي لازم يحصل قبل ما تبدأ:
• خد نسخة احتياطية كاملة — ملفات وقاعدة بيانات. راجع شرح تجهيز نسخة احتياطية كاملة للموقع.
• ولو الدومين عليه موقع شغّال، افتح تذكرة قبل ما تكمّل وإحنا هنراجع معاك ونقولك الطريقة الآمنة.
أأمن سيناريو: ابني على دومين جديد أو ساب دومين تجريبي الأول، وشوف النتيجة، وبعدين انقلها.
الأول: هل هي متاحة في حسابك؟
Sitejet بتظهر لو كانت متاحة في باقتك. لو مش لاقيها في حسابك، افتح تذكرة واسأل عن الباقات اللي شاملاها — ماتقضّيش وقت تدوّر عليها.
توصلها منين
لازم تكون على واجهة Meridian. ومن مركز Websites:
- لدومين جديد — اضغط Add a Website واختار Sitejet Builder.
- لدومين موجود — اضغط Manage جنبه واختار Build with Sitejet.
- لو حسابك جديد — هتلاقي زرار Build Your Website في لوحة المعلومات.
طريقتين تبدأ بيهم
١. تختار قالب جاهز
مكتبة قوالب احترافية، متجاوبة مع الموبايل ومجهّزة للسيو. تختار اللي قريب من مجالك وتعدّل عليه.
مناسبة لو عندك فكرة واضحة عن الشكل اللي عايزه، أو عايز تبدأ من حاجة مضمونة.
٢. مولّد المواقع بالذكاء الاصطناعي
تكتب وصف لموقعك، والأداة تولّد نسخة أولى كاملة — تنسيق وصور ومحتوى وهيكل صفحات. وفيه زرار Improve with AI بيساعدك ترتّب الوصف نفسه قبل التوليد.
وفيه كمان خيار Import content from my existing website بيحاول ينقل محتوى موقعك الحالي.
مناسبة لو لسه بتبدأ ومش عارف تكتب إيه، أو عايز نقطة انطلاق بسرعة.
كل ما الوصف يبقى محدد، النتيجة تبقى أحسن. بدل «موقع شركة»، اكتب: «شركة مقاولات في القاهرة، متخصصة في تشطيب الشقق، عايز صفحة أعمال سابقة وصفحة تواصل وأرقام واتساب».
واكتب الوصف بالعربي عادي — ودي فرصة تحط الكلمات اللي عملاؤك بيدوّروا بيها فعلًا في نص موقعك من أول يوم.
التعديل والنشر
- المحرّر بالسحب والإفلات — تضيف أقسام وتغيّر نصوص وصور من غير كود.
- الموقع مابيبقاش على الهوا غير لما تضغط Publish. قبل كده كل شغلك مسوّدة.
- بعد النشر، هتلاقي علامة Sitejet جنب الدومين في عمود Apps.
- عشان ترجع تعدّل، اضغط Edit Site.
راجع ده قبل ما تضغط Publish
- افتح الموقع على الموبايل — أغلب زوارك من هناك.
- جرّب نموذج التواصل وابعت رسالة تجريبية لنفسك.
- راجع عناوين الصفحات والأوصاف — دي اللي بتظهر في نتايج البحث.
- اتأكد إن بياناتك صح — التليفون والعنوان اللي المولّد كتبهم لازم تراجعهم، ممكن يكونوا أمثلة.
- راجع النصوص المولّدة كلمة كلمة — ماتنشرش كلام ماقريتهوش.
الموقع الجديد هيبقى ليه روابط صفحات جديدة. أي رابط قديم كان بيجيبلك زوار من البحث هيبقى 404، وترتيبك هيقع.
قبل الاستبدال: اعمل قايمة بأهم صفحاتك الحالية من Search Console، وبعد النشر اعمل تحويل ٣٠١ من كل رابط قديم للجديد المقابل له. من غير الخطوة دي بتخسر شغل سنين في يوم.
Sitejet ولا ووردبريس؟
- Sitejet أنسب لو عايز موقع تعريفي بسيط بسرعة، ومش عايز تتعامل مع تحديثات وإضافات وحماية.
- ووردبريس أنسب لو محتاج متجر إلكتروني، أو مدونة بمحتوى كتير، أو تحكّم كامل وإضافات متخصصة.
لو مترددّ، ابدأ بـ Sitejet على ساب دومين تجريبي وشوف هيكفيك ولا لأ قبل ما تقرر.
الخطوة الجاية
- تجهيز نسخة إحتياطية كاملة للموقع عن طريق السي بنل.
- التنقّل في Meridian: الشريط الجانبي والمراكز الستة.
- شرح كيفية تنصيب ووردبريس لموقعك.
محتاج مساعدة؟
افتح تذكرة باسم الدومين وقولنا عايز تبني موقع جديد ولا تستبدل موقع شغّال — ولو استبدال، كلّمنا قبل ما تبدأ عشان نظبط النسخة الاحتياطية والتحويلات معاك.
