ناوي تنقل موقعك لينا وقلقان إنه يقف أو تضيع بياناتك؟ الشرح ده بيوضّح الخطوات والمدة المتوقعة، وإيه المطلوب منك بالظبط.
الخلاصة: إحنا بننقل الحسابات مجانًا للعملاء الجداد. إنت بتفتح تذكرة وتدينا بيانات الوصول للسيرفر القديم، وإحنا بننقل، وإنت بتراجع، وبعدين توجّه الدومين. التوقف بيبقى قريب من الصفر لو المشي بالترتيب ده.
قبل ما تبدأ
- خد نسخة احتياطية كاملة بنفسك ونزّلها على جهازك. حتى لو النقل هيتم من ناحيتنا — دي نسختك إنت واللي بترجعلها لو حصل أي حاجة.
- جهّز بيانات الوصول للسيرفر القديم: cPanel أو FTP أو بيانات قاعدة البيانات.
- اعمل قايمة بكل حاجة عندك: عدد المواقع، حسابات البريد، قواعد البيانات، الدومينات.
- اشتري خطة الاستضافة الجديدة عندنا وفعّلها.
١. افتح تذكرة بطلب النقل
لقسم الدعم الفني، واكتب فيها:
- اسم الشركة اللي ناقل منها.
- أسماء الدومينات المطلوب نقلها.
- بيانات الوصول للسيرفر القديم.
- الحجم التقريبي للموقع.
- هل النقل يشمل البريد ورسايله ولا الملفات بس.
٢. المدة المتوقعة
| موقع صغير أقل من ١ جيجا | ساعات قليلة |
| موقع متوسط ١ لـ ٥ جيجا | من ٢٤ لـ ٤٨ ساعة |
| عدة مواقع أو حجم كبير | حسب الحالة — بنحدّدها في التذكرة |
المدد دي للنقل نفسه. تغيير أسماء الخوادم بياخد من ٤ لـ ٢٤ ساعة إضافية للانتشار.
٣. راجع قبل التوجيه — أهم خطوة
بعد ما ننقل، هنديك طريقة تشوف بيها الموقع على السيرفر الجديد قبل ما تغيّر أي حاجة للعالم. راجع كل حاجة الأول:
الصفحات · الصور · نموذج التواصل · لوحة التحكم · لو متجر: السلة والدفع · قاعدة البيانات متصلة.
وتقدر تشوف الموقع على السيرفر الجديد بتعديل ملف hosts على جهازك — راجع شرح نقل حسابات عملائك من سيرفر تاني للتفاصيل.
٤. غيّر أسماء الخوادم
بعد ما تتأكد إن كل حاجة تمام، غيّرها من عند مسجّل الدومين. خلال فترة الانتشار الموقع بيشتغل من السيرفرين — وده طبيعي ومش مشكلة.
٥. ما تلغيش القديم بسرعة
سيب اشتراكك القديم شغّال شهر على الأقل. لو اكتشفت حاجة ناقصة هتلاقيها لسه هناك. الإلغاء المبكر بيخلي أي حاجة منسية ضايعة للأبد.
حاجات بتضيع في النقل — انتبه لها
- رسايل البريد القديمة — أكتر حاجة بتضيع. اسأل صراحةً هل النقل يشملها.
- المهام المجدولة — مش بتتنقل تلقائيًا. سجّلها من السيرفر القديم وأعد إنشاءها.
- سجلات النطاق المخصصة — أي سجل ضفته يدوي لازم يتنقل.
- شهادات SSL المدفوعة — بتحتاج إعادة تركيب.
- حسابات FTP — أعد إنشاءها.
بعد النقل — لازم تعمل ده
- ظبّط SPF و DKIM و DMARC من جديد — سجلاتك القديمة بتاعة السيرفر القديم.
- اتأكد إن شهادة SSL اتصدرت.
- اتأكد إن الموقع بيفتح بـ HTTPS.
- خد نسخة احتياطية جديدة من السيرفر الجديد.
- راجع سرعة الموقع.
لو موقعك متجر
اختار وقت هادي وبلّغ عملاءك. وأهم حاجة: اوقف استقبال طلبات جديدة أثناء النقل لو أمكن، عشان ما يحصلش طلب على السيرفر القديم بعد ما تكون نقلت قاعدة البيانات.
الخطوة الجاية
- نقل بريدك من شركة تانية من غير ما تفقد رسايل.
- كيفية نقل حساب الاستضافة إلى شركتنا.
- كيفية نقل الدومين او النطاق إلى أستضافة مصر.
محتاج مساعدة؟
افتح تذكرة وابعتلنا اسم الشركة الحالية وأسماء الدومينات، وهنقولك الخطوات والمدة المتوقعة لحالتك بالظبط.
